Syfers syfers syfers…
So lyk ons 2014 graduandi

Ons het vanjaar ’n rekord aantal B Com graduandi en ’n hele paar regsgeleerdes. Maar dis nie waar dit eindig nie... Die Atterbury Trust het ook ons eerste dokter opgelewer!

Van ’n wildbewaarder en ’n voedseltegnoloog, tot twee kunstenaars en ’n handjievol ingenieurs… verlede jaar se oes van Atterbury afgestudeerdes wat in 2015 die mark betree, is reg om op ’n wye verskeidenheid velde tot die ekonomie by te dra.

Sewentien jaar nadat Atterbury vir die eerste keer studiebeurse toegeken het, het ons aan die einde van 2014 ’n rekordgetal van 53 studente gehad wat grade of diplomas ontvang het. Dit bring die totaal van jongmense wat sedert 1998 met die hulp van Atterbury verder kon studeer tot ongeveer 420!

Sewentien lede van die 2014 groep het besluit dis nog nie klaar met swôt nie, en het teruggegaan boeke toe om vanjaar hulle Honneursgraad aan te pak, en nog een doen vanjaar ’n meestersgraad. ’n Verdere 17 van die afgestudeerdes is tans besig met prakties, internskap of klerkskap. Dit bring ons by 31 Atterbury alumni wat òf reeds ’n beroep betree het, òf hard aan die soek is vir ’n pos.

Atterbury studente beursfunksie

 ’n Skool wat sy lig laat skyn

Met sy leuse “Laat Jou Lig Skyn”, leef Laerskool Generaal Nicolaas Smit in Claremont die beginsels van naastediens behoorlik uit, en alles te danke aan die toewyding van ’n skoolhoof met ’n droom, Chris Sealie.

Een van die bevredigendste aspekte van Atterbury Trust se werk in die gemeenskap is om te doen te kry met ’n organisasie of ’n individu wat ook gemik is daarop om mense te help, en wat daadwerklik ’n verskil maak in die lewens van diegene wat minder het as hulle. Chris Sealie is die skoolhoof van Laerskool Generaal Nicolaas Smit in Claremont, Pretoria en hy werk al 18 jare onvermoeid om sy skool ’n hawe te maak vir die behoeftiges van die omgewing.  Hoewel die 84-jarige laerskool een van Pretoria se behoeftigste skole is, is dit meer as net ʼn plek waar leerders kom vir lesse in lees en skryf: daar is ook ʼn voedingskema om honger kinders se magies te vul, asook gesondheidsdienste wat gratis gehoorapparate vir behoeftige ouers verskaf, en baie meer.

Met die beplanning tans aan die gang om ’n volledig ingerigte gemeenskapsentrum in Booysens te vestig, is dit baie waardevol om met ’n goeie laerskool in die omgewing kragte saam te span, verduidelik Atterbury se Zahn Hulme. “Die gemeenskapsentrum sal ’n na-skoolse fasiliteit insluit waar kinders kan kom huiswerk doen onder toesig, en ons verwag dat heelwat van Genl Nicolaas Smit se leerlinge hiervan sal kan gebruik maak.”